रुपयाने विक्रमी नीचांकी पातळी गाठली: अमेरिका आणि इराण यांच्यातील वाढता तणाव, कच्च्या तेलाच्या वाढत्या किंमती आणि जागतिक अनिश्चितता यांच्यात आज रुपयाची मोठी घसरण दिसून येत आहे. आज 27 मार्च रोजी डॉलरच्या तुलनेत रुपया इतिहासातील नीचांकी पातळीवर घसरला आहे आणि प्रति डॉलर 94.28 रुपयांच्या पुढे गेला आहे.
डॉलरच्या तुलनेत रुपया इतका का मागे पडतोय?
- अमेरिका, इस्रायल आणि इराणमधील युद्ध संपण्याची चिन्हे दिसत नाहीत. युद्धाच्या भीतीमुळे आणि ते लांबणीवर पडल्यामुळे आंतरराष्ट्रीय बाजारात ब्रेंट क्रूडच्या किमती प्रति बॅरल 100 डॉलरच्या पुढे गेल्या आहेत. भारत आपल्या गरजेच्या 88 टक्के तेल आयात करतो. अशा स्थितीत डॉलरची मागणी अचानक वाढली आहे.
- जागतिक अनिश्चिततेच्या या वातावरणात गुंतवणूकदार भारतीय शेअर बाजारासारख्या जोखमीच्या गुंतवणुकीतून पैसे काढून अमेरिकन डॉलरमध्ये गुंतवत आहेत. त्यामुळे डॉलरची मागणीही वाढली आहे. डॉलरकडे ‘सेफ हेवन’ म्हणून पाहिले जाते.
- विदेशी संस्थागत गुंतवणूकदार भारतीय शेअर्सची विक्री करून सतत बाहेर पडत आहेत. इराणमधील युद्ध सुरू झाल्यापासून, परदेशी गुंतवणूकदारांनी भारतीय बाजारातून सुमारे $5 अब्ज ते $8 अब्ज डॉलरची विक्री केली आहे.
- होर्मुझ सामुद्रधुनीवर सार्वभौम नियंत्रणाची अट इराणने अमेरिकेसमोर ठेवली आहे. हा महत्त्वाचा सागरी मार्ग बंद करण्याच्या इराणच्या धमकीमुळे ऊर्जा पुरवठ्याबाबत प्रश्न निर्माण झाले असून, त्यामुळे गुंतवणूकदार घाबरत आहेत.
सामान्य माणसावर परिणाम
- जर डॉलरच्या तुलनेत रुपया कमजोर झाला, तर कच्च्या तेलापासून ते खाद्यतेल, मोबाईल, इलेक्ट्रॉनिक्स या वस्तू महाग होतील कारण भारत या गोष्टी मोठ्या प्रमाणावर आयात करतो, ज्यासाठी डॉलरमध्ये पैसे दिले जातात. जर रुपया कमजोर झाला तर भारताला डॉलरच्या तुलनेत अधिक पैसे मोजावे लागतील.
- सामान्यत: महागाई वाढली तर त्यावर नियंत्रण ठेवण्यासाठी आरबीआय आगामी काळात रेपो दरात वाढ करू शकते. यामुळे तुमची कर्जावरील ईएमआय महाग होऊ शकते.
- रुपयाच्या घसरणीमुळे परदेश प्रवास आणि परदेशात अभ्यास किंवा वैद्यकीय उपचारांवर होणारा खर्च वाढू शकतो कारण आता डॉलरच्या तुलनेत अधिक रुपये मोजावे लागणार आहेत.
हे देखील वाचा:
