मध्य पूर्व तणाव: इराणवर अमेरिका आणि इस्रायलच्या संयुक्त हल्ल्यानंतर मध्यपूर्वेतील परिस्थिती अत्यंत तणावपूर्ण बनली आहे. इराणकडून प्रत्युत्तर म्हणून इस्रायलसह अमेरिकेच्या लष्करी तळांनाही लक्ष्य केले जात आहे. या वाढत्या संघर्षादरम्यान, जागतिक ऊर्जा बाजाराबद्दल गंभीर चिंता व्यक्त केली जात आहे. या संदर्भात व्लादिमीर पुतिन यांनी म्हटले आहे की, इराणवर अमेरिका-इस्रायलच्या हल्ल्यांमुळे जागतिक ऊर्जा बाजारात मोठे संकट निर्माण झाले आहे.
पुतिन यांचा इशारा
रशियाचे अध्यक्ष व्लादिमीर पुतिन यांनी सोमवारी (स्थानिक वेळेनुसार) सांगितले की, होर्मुझच्या सामुद्रधुनीतून होणारी तेलाची वाहतूक येत्या आठवड्यात पूर्णपणे थांबू शकते. युरोपियन युनियनची इच्छा असल्यास रशिया दीर्घकालीन ऊर्जा सहकार्यासाठी तयार आहे, असेही ते म्हणाले. वरिष्ठ सरकारी अधिकारी आणि रशियाच्या प्रमुख तेल कंपन्यांचे अधिकारी यांच्यासोबत झालेल्या दूरचित्रवाणी बैठकीत पुतिन म्हणाले की, मध्य पूर्वेतील बिघडलेल्या परिस्थितीमुळे जागतिक तेल पुरवठ्यावर मोठा दबाव आला आहे. यामुळे तेलाच्या किमतीत मोठी वाढ झाली असून, त्याचे जागतिक अर्थव्यवस्थेवर गंभीर परिणाम होऊ शकतात.
तेलाच्या किमतीत वाढ
या तणावादरम्यान, कच्च्या तेलाच्या किमती सुमारे $119 प्रति बॅरलपर्यंत वाढल्या आहेत, जी 2022 नंतर प्रथमच इतकी उच्च पातळी आहे. तेलाच्या किमतीतील ही वाढ मुख्यतः होर्मुझच्या सामुद्रधुनीतून पुरवठा खंडित होण्याच्या भीतीमुळे दिसून येत आहे. हा अरुंद सागरी मार्ग जागतिक तेल आणि वायू पुरवठ्यासाठी अतिशय महत्त्वाचा आहे, ज्यातून जगातील एकूण तेल आणि वायूचा एक पंचमांश भाग जातो.
रशिया हा जगातील दुस-या क्रमांकाचा तेल निर्यातदार आणि सर्वात मोठा गॅस साठा असलेल्या देशांपैकी एक आहे, असेही पुतीन म्हणाले. अशा स्थितीत मॉस्कोला सध्याच्या परिस्थितीचा फायदा होऊ शकतो. बदलत्या जागतिक परिस्थितीचा फायदा घेण्यासाठी त्यांनी रशियन ऊर्जा कंपन्यांना तयार राहण्यास सांगितले.
