भारत विरुद्ध इंग्लंड उपांत्य फेरी: 2026 च्या T20 विश्वचषकातील दुसरा उपांत्य सामना भारताने 7 धावांनी जिंकला. टीम इंडियाने दिलेल्या 254 धावांच्या लक्ष्याचा पाठलाग करताना इंग्लंडचा संघ 246 धावांपर्यंत पोहोचला, मात्र विजयापासून फक्त 7 धावा दूर राहिला. श्वास रोखणाऱ्या या सामन्यात जेकब बेथेलने १०५ धावांची शतकी खेळी खेळली. त्याआधी संजू सॅमसनने 89 धावा केल्या होत्या आणि या उपांत्य फेरीच्या सामन्यात एकूण 499 धावा झाल्या होत्या. भारत विरुद्ध इंग्लंड उपांत्य फेरीच्या सामन्यात सुरुवातीपासून शेवटपर्यंत 5 मोठे विक्रम मोडले गेले.
भारत-इंग्लंड उपांत्य फेरीत मोडले 5 मोठे विक्रम
टी-२० विश्वचषकाच्या सामन्यात सर्वाधिक धावा- भारत आणि इंग्लंड यांच्यातील उपांत्य फेरीच्या सामन्यात एकूण 499 धावा झाल्या होत्या. टी-20 विश्वचषकाच्या इतिहासात एका सामन्यात केलेल्या या सर्वाधिक धावा आहेत. यापूर्वी हा विक्रम 459 धावांचा होता, जो 2016 मध्ये झालेल्या इंग्लंड विरुद्ध दक्षिण आफ्रिका सामन्यात बनला होता.
जेकब बेथेलचा जागतिक विक्रम- जेकब बेथेलने 45 चेंडूत आपले शतक पूर्ण केले. टी-२० विश्वचषकाच्या इतिहासात इंग्लंडचे हे सर्वात जलद शतक आहे. त्याच सामन्यात त्याने 19 चेंडूत अर्धशतक पूर्ण केले, जे टी-20 विश्वचषकातील इंग्लंडसाठी सर्वात जलद अर्धशतक देखील आहे.
टी-20 विश्वचषक सामन्यात सर्वाधिक षटकार- भारत विरुद्ध इंग्लंड उपांत्य फेरीच्या सामन्यात एकूण 34 षटकार मारले गेले. भारतीय डावात एकूण 19 षटकार तर इंग्लंडच्या डावात 15 षटकार मारले गेले. कोणत्याही T20 विश्वचषक सामन्यात मारले गेलेले हे सर्वाधिक षटकार आहेत. यापूर्वी हा विक्रम 31 षटकारांचा होता, जो याच स्पर्धेत वेस्ट इंडिज विरुद्ध झिम्बाब्वे सामन्यात मारला गेला होता.
T20 विश्वचषकात सर्वाधिक षटकार (संघ) – भारतीय संघाने टी-20 विश्वचषक स्पर्धेत सर्वाधिक षटकार मारण्याचा विक्रम केला आहे. आतापर्यंत या विश्वचषकात भारताने 88 षटकार मारले आहेत, या बाबतीत टीम इंडियाने वेस्ट इंडिजला मागे टाकले आहे, ज्याने याच वर्ल्डकपमध्ये 76 षटकार ठोकले होते.
पुरुषांच्या T20 क्रिकेटमध्ये सर्वाधिक 250+ धावा- पुरुषांच्या T20 क्रिकेटमध्ये भारताने 250 पेक्षा जास्त धावा करण्याची ही सहावी वेळ होती. हा एक विश्वविक्रम आहे. वेस्ट इंडिज आणि झिम्बाब्वे या यादीत दुसऱ्या स्थानावर आहेत, ज्यांनी प्रत्येकी तीन वेळा अशी कामगिरी केली आहे.